Di Keraton Yogyakarta
Berdua
----------Horas-----HORAS-----Horas----------
- Bahwa Marga yang dipakai oleh turunan Raja Silo sampai sekarang ini adalah :
1. SILO.
2. SORMIN.
3. BAUMI.
Molo taetong sundut (= generasi), sundut papituhon ma Patuan Sumar Marga Sormin turunan ni Toga Siregar.
Sundut parjolo, Toga Siregar -------------------------------------------
dua niolina/ripena ima boru ni rajai Raja Limbong Mulana,
ina parjolo : Si Boru Pandan Haomasan, anakna 2 ima :
------------Raja Silo dohot Raja Dongoran, ----------------------------
ina paduahon : Si Boru Harungguan, anakna 2 ima :
-----------Raja Silali dohot Raja Sianggian. ---------------------------
Sundut paduahon, Raja Silo --------------------------------------------
anakna 5 ima :Ompu Tuan Dihorbo, Si Lima Lombu, Tuan Na Hoda, Datu Bira, Datu Mangambe.
Sundut patoluhon Oppu Tuan Di Horno ------------------------------
sada do anakna ima Ama Tuan Dihorbo.
Sundut paopathon Ama Tuan Dihorbo, -------------------------------
anakna ima Datu Na Sangap.
Sundut palimahon Datu Nasangan, ------------------------------------
dua niolina/ripena,
tubu ni ina parjolo boru Pasaribu, anakna ima :
Si Jambe Ulu Balang,
tubu ni ina paduahon boru Huta Gaol. anakna ima
Raja Na Ubanon .
Torsa do nitortorhon, ninna diturihon, parjolo tubu ia Raja Na Ubanon tinubuhon ni boru Huta Gaol, dungipe (sorang) ditubuhon omputta boru Pasaribu ma ia Si Jambe Ulubalang.
Sundut paonomhon Raja Na Ubanon, --------------------------------
Ia tarombo ni pinompar ni Patuan Sumar Sormin, tolu anakna ima : Raja Banua, Mangasa Raja dohot Patuan Sumar.
Alai ia tarombo ni pinompar ni Mangasa Raja mandok dua do anak ni Raja Na Ubanon, ima : Raja Banua dohot Mangasa Raja.
Ia Patuan Sumar pandok ni turunan ni Mangasa Raja ido na margoar Datu Na Sumar anak ni Mangasa Raja.
Songon dia do sintong na, parsoalan on ditaon 1971 gabe polemik
Sundut Papituhon Patuan Sumar, ---------------------------------------
Tolu anakna 3 ima :
1. Oppu Sairu.
2. Tambok Na Begu.
3. Raja Silampiang.
PATUJOLO :
Dung di tano parserahan, muba do naung somal binoto jala niondoshon diakka torsa pandohan ima taringot tu tutur partubu di pinompar ni opputta Raja Silo sian tano Pangaribuan dohot di pandohan tu Marga Sormin pinompar ni PATUAN SUMAR. Pola do marsiadu jogal di tonga ni mangajana sipata rimas pailahon dipakkataion na mansoadahon baringin ni pinompar ni Patuan Sumar Marga Sormin sian dongan tubu pinompar ni Raja Silo.
Molo tapaihut-ihut torsa ni turi-turian porngis eme di boltokna di tano Muara hatihaima pinompar ni Toga Siregar manoto borhat dompak Angkola, mamukka huta di tano Pangaribuan. Pinompar ni Raja Silo dibahen margana Marga Sormin, pinompar ni Raja Dongoran margana Dongoran, pinompar ni Raja Silali dibahen margana Marga Ritonga, ia pinompar ni Raja Sianggian dibahen margana Marga Siagian. Alai dang tolop sude pinompar ni Toga Siregar i mangihuthon horong partubuna tu pandohan ni margana, diboanton do panjouon ni margana Marga Siregar, lomobi ma nasida na marhuta di Angkola - Sipirok sahat tu Sipiongot Gunung Tua - Mandala Sena.
Dia do jumolo masa, di Muara Pea Arung, pinompar ni Raja Sili dibahen margana Marga Silo, pinompar ni Raja Silali dibahen margana Marga Silali, hombar tusi nunga masigabean nasida jala marpinoppardo maranak marboru, songoni di tano Pangaribuan nunga masigabean nasida pinompar ni Raja Silo (Marga Sormin), Marga Dongoran, Marga Silali (Ritonga) dohot Marga Siagian. Alai hombar tusi sian dos ni tahi na ditariashon di pesta olop olop mamestahon TUGU PERSATUAN TOGA SIREGAR di bona pasogit tano Muara taon 1974 dipangido asa unang be masigabean pinompar ni Toga Siregar, tu akka ianakkonta asa dipodahon na mardongan tubu marhaha anggi mariboto do sude pinomppar ni Toga Siregar, asa unang be diulahi naung salpu tu parsaripeon.
Diakka parsaoran tung ulido ihut tu pambaenan, takkasdo mardongan tubu mariboto, alai nang pe songoni dung tahun 1974 PESTA OLOP-OLOP TOGA SIREGAR, hot ripe do na hot ripe nasida jala takkasdo nasida pinompar ni Toga Siregar (Marga/boru Siregar, Sormin, Dongoran, Ritonga, Siagian).
Na so boi hata muruk manang rimas tu nasida, parroha na ias jala lambok malilung do omputta marsolu sukkit Sillam Debata sisuruk borngin sitompas haba-haba manghirab las ni roha.
Di ombas hatihaon dang mangarigati dan manulikkiti, takkas do taboto pustaha ha-Batak-on tumbaga holing gorga habisuhon nang parbinotoan, torsa do gabe turi-turian molope digurithon na dapot luluan di pustaha sileban, dang rikkari tu pinompar marsundut-sundut songon parbinotoan ni Jahudi (Buku Taurat) na pabotohon hamumula ni langit dohot tanoon tu panompaon ni jolma sahat tu Oppu ni na porsea ima si ABRAHAM dohot ianakkonai si ISMAIL tubu ni si HAGAR (dari keturunannya lahir NABI MUHAMMAD SAW) dohot si ISAK tubu ni si SARA ro di sundut partubu sahat tu YESUS KRISTUS (Juru Selamat bagi umat Kristiani).
Homit do parbinotoan songon dia do ha-Batak-on, ala mulana tikkado di puncu ni Pusuk Buhit maralaman tu tao (Toba) manamue di Sianjur Mula-Mula oppui si Raja Batak (?), torsa ni oppu si jolo-jolo tubudo niulahan jala naniingot, dang adong mangugai, boha sittongna haporseaon do molo nirajuman.
Marsialado pandohan i, alana dipaborhat do iba sian tano Pangaribuan (Lumban Sormin)dung tolhas tu tano parserahan huhut marsaor dohot dongan tubu pinompar ni Tuga Siregar, ajar poda sian natoras taringot tu tarombo ni andehondo, diruhut ni partubu sian horong pinompat ni Raja Dongoran, Raja Silali dohot Raja Sianggian dang adong hata manihai, tungpe nian diguret ni partarombo (Sihite tahun 1940, dohot W.S.Huta Galung, tahun 1928 didok disi SORMIN dohot RITONGA marhahaanggi pinompar ni RAJA SILALI), hape diparsaoran dohot dongan tubu pinompar ni Raja Silo tu pinompar ni Si Jambe Ulubalang dohot tu haha partubu pinompar ni Raja Na Ubanon tungpe adong nados alai gabe halangdo tu pakkilaan. ima :
1. Di pandapot na mandok anak ni Raja Na Ubanon dua : Raja Banua dohot Mangasa Raja. Lapatanna dang tolu anak ni Raja Na Ubanon. Dang adong goar Patuan Sumar (=Oppu Tuan Sumar) di torsa tarombo ni pinompar ni Raja Silo sian Muara (Pea Arung).Pandok ni sebagian ian pinompar ni Mangasa Raja ia Patuan Sumar dang anak ni Raja Na Ubanon, alai pahompu ni Raja Na Ubanon manang patoluhon anak ni Mangasa Raja, ima na margoar DATU NA SUMAR.
2. Pinompar ni Raja Silo na dapot di tarombo sian Datu Nasangap dua ina, tubu ni boru Pasaribu : Si Jambe Ulubalang, tubu ni boru Huta Gaol : Raja Na Ubanon. Pandok ni torsa jumolo tubu do si Raja Na Ubanon.
Di tano Pangaribuan ruhut martutur ia haha partubu pinompar ni Raja Na Ubanon, anggI-doli do pinompar ni Si Jambe Ulubalang.
Alai balikna diruhut na masa di Muara/Pea Arung diondoshon sahat tu parserahan nuaeng on ia haha-partubu pinompar ni Si Jambe Ulubalang, anggi-doli do pinompar ni Raja Na Ubanon.
Di akka torsa pandokna ia Datu Na Sangap mangalap boru Pasaribu hape dang gabe-gabean, alanii dialap muse boru Huta Gaol, dapot ditikkina tubuan anak ima Raja Na Ubanon. Saguru di Mulajadi do, dapotma di buhuna gabe-gabean ma boru pasaribu tubuan anak ima Si Jambe Ulubalang.
Pandok ni nampuna hata ia boru Pasaribu ima permaisuri, alanii ruhut ni tutur anakni Datu Na Sangap, sihahaan Si Jambe Ulubalang, anggi-doli Raja Na Ubanon.
Hum ni adat do diparjambari, asi muba dung di tano Pangaribuan di parsaoran ni pinompar ni Raja Silo na manjaouhon margana Marga Sormin.
Tohomai hurang do argana molo hita Batak dang hantus diboto tarombona, alai bohama baenon mamastihon na masa na robi marhite akka turi-turian sambing. Sugari digoretton sian mulana di buku laklak partording ni partubu dohot ruhut ni tutur di akka horong ni marga-marga naung diojakkon dang sanga purpar di pudian ni ari, ai molo masiboan pandapotna dos do siboanon neang manang dokdok dang adong umboto i.
Molo ta bilang-bilangi sian sejarah ni si Raja Batak sahat tu si Boru Pareme (Raja Lontung) berarti (Batak Toba) sian Pusuk Buhit ma marserak tu topi tao Toba na humaliang, opputta Toga Siregar di pillit hutana di Muara rap dohot marga-marga na asing.
Sadiharima hatiha pinompar ni Toga Siregar marserak sian Tano Muara boi do tapadomu domu hum pe turi-turian tu sejarah tertulis, dohot akka partanda na adong.ima candi Portibi di Angkola na dipajongjong Kerajaan Sriwijaya sian Palembang, dohot parmusuon ni tentera Bonjo sian Minangkabau (Tuanku Rao), hatiha i nga gok huta na diingani akka marga marga Batak Toba di Angkola – Mandailing, lumobi di Tano Pangaribuan (Kec. Pagaribuan, Kec. Sipahutar dohot Kec Garoga di Kab Tapanuli Utara).
Torsa na dibaligahon gabe turi-turian di turunan Toga Siregar, jolo sian Lobu Siregar do asa marserak dompak Angkola mamolus Tano Pangaribuan huhut mamukka huta di Tano Pangaribuan sahat tu na adong huta “Lumban Sormin”.
Antong, isedo akka opputta na borhat sian Lobu Siregar tu Tano Pangaribuan pinatording tu akka hutana, jala sadihari do parborhat nasida nipadomu-domu tu sejarah tertulis i.
Deba mandok di sundut paonomhon ma turunan Toga Siregar borhat sian Lobu Siregar. Molo taetong umur masundut-sundut boi dohonon 20 tahun ma sasundut, sundut turunan Toga Siregar nidokma 25 sundut, jadi 450 tahun na salpu manang tahun 1558 Masehi. di hatihaima horong marhorong pinompar ni Toga Siregar nga marhuta di Tano Pangaribuan. Pinompar ni Raja Silo sahat do tu Angkola, ia margana dibaendo Marga Siregar, Marga Sormin, Marga Siregar Baumi.
Di gorgeton di huta Lumban Sormin dohot di huta Najumambe na maringan disi Marga Sormin. Di Najumambe pinompar ni Si Jambe Ulubalang, sahat do nasida mamukka huta tu Pahae. Kolang Tapanuli Tengah, Marancar Batangtoru (pinompar ni Mangasa Pintor, margana Marga Siregar Baumi) Songoni muse sian Lumban Sormin, sahat do marhuta tu Angkola, tu Alas/Aceh adaong do huta margoar Lumban Sormin)
Tikkosdo uga ni raja parhata padalan uhum dohot adat, na toktong diradoti jala diharikkotton huhut sai dimemehon tu naposo asa hot pir di hundulanna. Dipasidingdo asa unang eme na masak di gagat ursa, naengma marhapadot manambori, ai suhutdo nampuna ugasan pasahat somba ni uhum dohot na patupahon panggori tu parjambaran asa hattus tu ruhut na manjalo dohot na manggarar adat
Dimemehon do ia torsa ni habatahon, dang tarsurat, boi dohonon gabe turi-turiam sambing, dang ro ngiet/keinginan mulai na jolo lao paresohon sittongna songon dia. Ditikkion manang tu akka naposo dang diharikkotton, alani hamajuon IPTEK dohot namanjalahi ngolu gabe dang sanga tikki marsirarion huhut manangi-nangi pakkataion ni natua-tua di partukkoan di bahal ni huta.
Dang na mandok gabe lupa ditorsa, alai molo pediboto akka na hombar tu tarombo dang pangumpolan i tu na deba, ai sian mulana pe sopo (Ruma Batak) dang marbilut-bilut, tung patardo sian talaga sahat tu juluan, dang adong na buni. Songonido nang ruhut parpeak tarombo ni Patuan Sumar Marga Sormin na marhuta di Tano Pangaribuan sahat tu Angkola, ue hamu ikkon tajujungdo baringinta. Dos do i tu na marugamo ikkon adong do langgatan, suang le songon pinompar ni Toga Siregar sada pinatudu di pesta olop-olop Tugu Persatuan Toga Siregar Tahun 1974 di Muara, antong sada do hita pinompar ni omputta Patuan Sumar Marga Sormin na di parserahan rap dohot na di bona pasogit.
Rabu, 30 Maret 2016
Langganan:
Postingan (Atom)
